Mibuhos ang pahasubo alang sa pagkamatay sa lider sa Simbahang Katoliko nga si Pope Francis kagahapong adlawa, Abril 21, sa edad nga 88.
Kini human ang Iyang Eminence Cardinal Kevin Farrell, Camerlengo sa Apostolic Chamber, mikompirma sa pagtaliwan sa Santo Papa sa iyang pinuy-anan sa Casa Santa Marta sa Vatican.
Lakip sa mihatag og pasidungog ngadto sa Santo Papa mao ang pipila ka mga lider sa kalibutan sama ni French President Emmanuel Macron, kinsa mitawag sa Santo Papa nga usa ka “man of humility” samtang ang Dutch Prime Minister Dick Schoof mihulagway sa Santo Papa isip usa ka role model alang sa mga Katoliko nga magtutuo ug dili Katoliko.
Gihulagway ni European Parliament President Roberta Metsola si Pope Francis sa iyang makatakod nga pahiyom nga nakabihag sa kasingkasing sa milyon-milyong mga tawo sa tibuok kalibutan.
Ang Presidente sa Israel nga si Isaac Herzog midayeg sa walay katapusan nga kalooy sa Santo Papa. Ang Presidente usab sa Switzerland nga si Karin Keller-Sutter mihulagway kang Pope Francis nga usa ka “great spiritual leader ug walay kakapoy nga tigpasiugda alang sa kalinaw.”
Ang pagkamatay ni Pope Francis nahitabo usa ka adlaw pagkahuman sa iyang pagpakita sa publiko sa St. Peter’s Square niadtong Domingo sa Pagkabanhaw.
Si Pope Francis mao ang unang Santo Papa sa kapin sa usa ka siglo nga gilubong gawas sa Vatican. Ang patayng lawas ni Pope Francis ilubong sa Basilica of St. Mary Major, usa sa upat ka dagkong papal basilica sa Roma.
