Narekober sa Philippine Coast Guard (PCG) ang laing duha ka mga lawas gikan sa naunlod nga MV Hong Hai 16 sa Rizal, Occidental Mindoro.
Sa talaan sa PCG nga gipagawas kagahapon, Abril 17, ang unang patayng lawas nakit-an alas 8:15 sa buntag sa accommodation area sa barko, samtang ang ikaduha nakaplagan alas 11:36 sa usa ka cabin sa main deck.
Wala pa mailhi ang mga biktima samtang ang mga naluwas gihangyo nga motabang sa pag-ila.
Sa pagkakaron, pito na lang ka tawo ang kulang sa 25 ka tawo nga sakay sa barko kung asa 13 niini mga Filipino ug 12 ang Chinese national.
Nagbutang usab ang PCG og 250 metros nga oil spill boom isip pag-amping, bisan og walay oil leak nga nakita sa palibot.
Giklaro pa sa PCG nga walay krudo nga dala ang maong barko, ug ang automotive oil ra ang posibleng mo-evaporate.
Ang PCG padayon nga nagpahigayon og search and rescue operations, samtang gisiguro usab ang kaluwasan sa ilang mga personnel.
