Mitestigo si kanhi Department of Public Works and Highways o DPWH Secretary Manuel Bonoan atol sa bail hearing ni Senador Jinggoy Estrada atubangan sa Sandiganbayan Fifth Division.
Sa iyang testimonya, gibutyag ni Bonoan nga giingong mihangyo si Estrada og mga proyekto nga mokabat sa usa ka bilyong piso aron maapil sa national budget pinaagi sa kanhi DPWH Undersecretary nga si Robert Bernardo.
Sumala ni Bonoan, gilutaw ang maong hangyo alang sa dugang nga pondo tungod sa posisyon sa senador isip Senate President Pro Tempore ug giugnay usab kini sa giingong mga galastohan sa eleksiyon.
Bisan og usa ka bilyong piso ang gihangyo ubos sa Senate Leadership Fund, 700 milyong piso lamang ang opisyal nga naaprobahan sa General Appropriations Act o GAA.
Sa dihang gipangutana sa kampo sa depensa kon unsa siya kasiguro sa iyang gipadayag, miingon si Bonoan nga wala siyay rason sa pagduhaduha tungod kay suod nga managhigala sila ni Bernardo.
Nailhan usab nga kanhi district engineer sa Manila si Bernardo sa panahon nga mayor pa sa siyudad ang amahan sa senador nga si kanhi Presidente Joseph Estrada.
Sa pagkakaron, wala pa magpagawas og tubag ang kampo ni Jinggoy Estrada kalabot sa mga pahayag ni Bonoan.
Naglaom gihapon ang senador nga tugotan ang iyang hangyo nga makapiyansa aron makabalik sa iyang trabaho sa Senado.
