Gibisita ug giinspeksyon pag-usab ni kanhi Department of Public Works and Highways Secretary Vince Dizon ang Kilicao-Binitayan Bridge sa lungsod sa Daraga, Albay, sa wala pa ang iyang pagbalik isip kalihim sa Department of Transportation kon DOTr.
Matod ni Dizon, gikatakdang ablihan sa mga motorista ang duha ka lane sa maong tulay sa sunod semana sa wala pa ang Kalag-Kalag.
Gipahayag ni Dizon nga napadali ang pagpatuman sa proyekto ubos sa direktiba sa kasamtangang administrasyon, ilabi na kay hapit na kini 15 ka tuig nga wala mahuman sukad pa sa panahon ni kanhi Ako Bicol Partylist Representative Zaldy Co.
Matod niya, sa kataposan mahuman na ang proyekto ug magamit na dayon sa publiko. Magpahigayon usab og road testing samtang magtinabangay ang mga lokal ug rehiyonal nga opisyal aron masiguro ang luwas ug hapsay nga pag-agi sa mga residente ug motorista.
Malipayon usab nga gidawat ni Albay Governor Noel Rosal ang maayong balita ug miingon nga magsilbi ang maong tulay isip importanteng bypass road ug koneksyon sa nagkalainlaing barangay ug distrito sa lalawigan.
Nagpasalamat usab ang gobernador sa maayong koordinasyon tali sa DPWH ug sa nasudnong gobyerno aron sa kataposan matuman na ang dugay nang gipaabot nga proyekto.
