Patay ang usa ka 20 anyos nga babayeng estudyante atol mismo sa graduation day niini niadtong Abril 14, 2025.
Sa pakighinabi sa Bombo Radyo Gensan, gibutyag ni Alyas Panny, inahan sa biktima nga miuna og adto ang anak niya sa Banisil National High School diin kini nagtungha tungod sa graduation niini.
Apan human ang pipila ka minuto, adunay nagpahibalo kaniya sa dili maayong nahitabo sa anak hinungdan gilayong miadto sa eskwelahan.
Pag-abot niya sa lugar naabtan niya ang anak nga nagbuy-od sa salog kansa nakaangkon og samad sa tuhod ug kilay.
Ang biktima giilang si Khentjoy Balsomo Beatisula ug residente sa Brgy. Fatima ning dakbayan.
Sumala ni Police Major Wesley Matillano, Chief of Police sa Tambler Police Station nga sa ilang gihimong imbestigasyon nasuta nga nadagma ang biktima og nabunal ang ulo sa semento.
Gisulayan pa kini og dala sa ospital ang biktma apan gideklara gihapon nga patay na og sumala sa inahan sa nasampit nga nakaangkon og internal hemorrhage ang ulo nga bahin.
Mipaabot ang Banisil National High School, ang tulunghaan sa biktima sa ilang pahisubo tungod sa panghitabo.
Sa pagkakaron, gihaya na ang biktima sa panimalay nila sa Brgy. Fatima.
