Magsilbi nga associate counsel sa defense team ni kanhi Pang. Rodrigo Duterte ang bag-ong abogadong nadungag sa maong grupo.
Kagahapon, Abril 8, dihang gipagawas sa International Criminal Court (ICC) ang usa ka court filing nga nagpakita nga gikuha sa defense team ang batikang abogado nga si Dov Jacobs.
Si Jacobs usa ka accredited ICC lawyer, og eksperto sa international law og international criminal law.
Siya nahimong kabahin sa defense team sa kanhi presidente sa Ivory Coast nga si Pres. Laurent Gbagbo nga kanhi usab naatubang sa kasong crimes against humanity apan kaulahian na-aquit sa Trial and Appeals Chamber sa ICC.
Kabahin usab siya sa defense team ni Mahamat Said Abdel Kani, usa ka kanhi general gikan sa Central African Republic nga nag-atubang sa nagkadaiyang kaso susama sa war crimes og crimes against humanity sa international tribunal.
Si Jacobs ang nagsilbing assistant professor sa public international law sa Netherlands og nagtudlo usab sa pipila unibersidad sa France.
Gigunitan niya ang pipila ka degree gikan sa King’s College sa London, Paris I Panthéon-Sorbonne, Paris II Panthéon Assas, Sciences Po sa Paris, og usa ka doctorate gikan sa European University Institute sa Florence, Italy.
Bag-o pa siya nahimong kabahin sa defense team sa kanhi pangulo, una na siya nga nagpagawas ug pahayag kabahin sa nahimong pag-aresto kang Duterte.
Lakip sa iyang gisaway mao ang wala matod pay pagrespeto sa katungod sa kanhi pangulo ubos sa Article 59 sa Rome Statute susama sa pagkadala niya sa usa ka domestic court, una siya gibyahe paingon sa The Hague og hingpit nga gisulod sa detention facility sa international court.
