Nagplano ang National Food Authority (NFA) nga mag-abang og mga pribadong bodega aron magamit sa umaabot nga ani sa humay.
Sa public briefing sa Bagong Pilipinas, si NFA Administrator Larry Lacson niingon nga daghang local government units (LGUs) ang gustong mopalit og bugas sa ahensiya apan nalangay mao ang proseso sa LGUs ug kakuwang sa pundo.
Tungod niini, matod niya, hinay ang pagpagawas sa bugas gikan sa ilang mga bodega bisan pa man sa pagdeklara sa Department of Agriculture (DA) og food security emergency.
Siya niingon nga ang mga LGUs nag-atubang og lain-laing mga pagsulay sa pagpalit og bugas gikan sa NFA sama sa kakuwang sa pundo ug uban pa nagkinahanglan og resolusyon aron tugotan nga makapalit sa NFA.
Apan ang opisyal nagkanayon nga daghang LGUs ang nipadayag sa ilang tinguha nga mamalit og bugas sa NFA ug base sa ilang record, mokabat sa 70 ka LGUs ang mopalit og bugas sa maong ahensya.
Tungod nagkaduol na ang pag-ani sa humay, siya niingon nga nagplano sila nga mag-abang og mga pribadong bodega aron tipigan og bugas nga mapalit sa lokal nga mga mag-uuma.
Matod niya aduna usab mga bodega ang mga kooperatiba nga andam magpahulam sa NFA, mao nga nakighinabi na sila sa mga gustong magpahulam sa ilang mga pasilidad
