Gipanghimakak ni Manila 3rd District Representatives Joel Chua karong Sabado nga gidali sa House of Representatives ang proseso sa impeachment ni Bise Presidente Sara Duterte.
Usa si Cong. Chua sa 11 ka mga kongresista nga nagsilbi sa House prosecution panel alang sa impeachment ni VP Sara.
Sa usa ka press conference karong adlawa, ang magbabalaod niingon nga ang mga aksyon nga gihimo sa Ubos Balay Balauranan sa Kongreso konstitusyonal o nalatid sa balaod.
Matod niya nga ang maong mga pasangil gipaabot gikan sa Partido Demokratiko Pilipino Lakas ng Bayan (PDP-Laban).
Sa sayo pa, ang Partido nga gipangulohan sa amahan ni VP Sara nga si kanhi Presidente Rodrigo Duterte, nipadayag sa hilabihang kasuko ug pagkondenar sa ilang dinalidali ug salingkapaw nga impeachment nga klarong pagpakita sa hugaw nga politika sa nasud.
Dihang gipangutana ang magbabalaod bahin sa ikaupat sa 7 ka articles of impeachment batok ni VP Sara nga may kalabotan sa giingong di matukib nga inflation sa iyang bahandi ug kapakyas pagbutyag sa iyang Statement of Assets, Liabilities, and Net Worth (SALN).
Si Chua niingon nga base kini sa gipasabot ni kanhi Sen. Sonny Trillanes atol sa House Quad Committee hearing niadtong Nobiyembre diin si kanhi Presidente Rodrigo Duterte ug iyang pamilya giingong nakadawat og P2.4 bilyones nga deposito sa bangko.
Gipangutana usab ang magbabalaod kon ang Kamara mihimo ba og kaugalingong kompirmasyon sa alegasyon ni Trillanes, pasabot ni Atty. Chua nga kinahanglan pa nilang susihon pag-ayo ang mga materyales o dokumento tungod kay giingong bag-o pa lang kining gihatag ug kinahanglan usab nilang susihon sa makadaghang higayon ang tanang ebidensya.
Apan giinsister ni Chua nga dunay bug-at nga ebidensiya sa unang 3 ka articles of impeachment apil na ang giingong panagkunsabo sa pagpatay kang Presidente Ferdinand Marcos Jr., First Lady Liza Marcos ug House Speaker Martin Romualdez kon mapatay si VP Sara, malversation of confidential funds ug bribery ug corruption sa DepEd ubos sa pagdumala ni VP Sara.
Sa laing bahin, sa habig ni VP Sara, iya nang gibarogan kaniadto nga dili siya mo-resign taliwala sa nagsingabot nga impeachment trial batok niya sa Senado.
