Gibutyag sa Philippine Drug Enforcement Agency (PDEA) ang lawom nga koneksyon sa POGO ug mga sindikato sa drugas atol sa Quad Comm hearing karong adlawa.
Gipresentar ni PDEA Deputy Director General Renato Gumban ngadto sa Quad Comm ang matrix nga nagpakita kung giunsa pagpatuman sa mga transnational sysindicates ang drug trafficking, money laundering ug ang kuwestiyonableng pagpalit ug yuta sa mga langyaw dinhi sa Pilipinas
Nagsugod ang imbestigasyon sa joint operations nga gihimo niadtong Septiyembre 24, 2023 diin 560 kilos nga gituohang shabu ang nasakmit sa Mexico, Pampangan nga nagkantidad og P3.6 Bilyones.
Ang nasangpit nga ilegal nga drugas napalgan sa usa ka bodega nga gipanag-iya sa usa ka Willie Ong nga nailhan usab nga Cai Qimeng kinsa incorporator usab sa Empire 999 Realty Inc., nga usa ka dakong kompanya nga nalambigit sa ginadili nga mga kalihokan.
Apil usab ang Golden Sun 999 Realty Inc. ug Development Corporation ug Yatai Industrial Park nga parehong may kalambigitan nilang Ong ug Aedy Yang.
Ang Golden Sun 999 adunay kalabotan kang Rose Nono Lin nga nalambigit sa kontrobersyal nga Pharmally Pharmaceutical Corporation.
Sa presentasyon sa PDEA, nasuta ang direktang koneksyon tali sa POGO ug mga kriminal nga sindikato.
Giila niini ang Hongsheng Gaming Technology nga POGO operator nga nakabase sa Bamban, Tarlac isip key player.
Gipondohan kini sa binilyon lakip na si Hong Jiang Yang ang igsoon ni Michael Yang.
Ang Hongsheng Gaming nag-abang sa ilang mga pasilidad gikan sa Baufu Land Development Inc., nga gipanag-iya ni Alice Guo.
Matud pa ni Rep. Gerville Luistro nga makahasol ang maong mga rebelasyon.
