Nagpatuman ang Department of Tourism kon DOT og usa ka bulan nga programa sa pagbansay alang sa mga ‘frontliner’ isip pagpangandam sa pag-host sa Pilipinas sa ’49th ASEAN Summit and Related Meetings’ sa Nobyembre.
Gibase ang programa sa Filipino Brand of Service Excellence aron maandam ang mga partisipante nga motrabaho isip ‘liaison officers’, ‘information officers’ ug ‘ushers’ sa mga gitakdang venue, hotel ug tugpahanan.
Matod sa DOT, mikabat na sa 244 ka partisipante gikan sa pito ka batch ang ilang nabansay sukad niadtong Oktubre 19.
Gidisenyo ni DOT Assistant Secretary Ma. Christina G. Aquino ang kurikulum, diin giapil ang mga eksperto isip mga tigpamulong aron itudlo ang mga sumbanan sa diplomasya ug serbisyo.
Ipailalom usab ang mga partisipante sa ‘stress test’, ‘panel interview’ ug ‘site inspection’ aron masiguro ang ilang pagkaandam sa dili pa ibutang sa ilang gitakdang mga katungdanan.
Matod ni Tourism Secretary Dita Angara-Mathay, tumong niini nga ipakita ang pinakamaayong ‘Filipino hospitality’ ug magbilin og maayong impresyon sa mga delegado gikan sa nagkalainlaing nasud.
Una nang gipahigayon ang pipila ka kalihokan sa ASEAN sa Visayas, diin nahimong ‘highlight’ ang mga nindot nga lugar nga gidayeg sa mga bisita nga nagdumala sa turismo sa nagkalainlaing nasud.
