GENERAL SANTOS CITY- Naghulat na lang sa katumanan sa pag-obserba sa Adlaw sa mga santos ug kalag aron ipaubos na sa hugot nga seguridad ang dakbayan sa Heneral Santos.
Kini subay sa pinakaulahi nga panagtagbo sa City hall department heads ug ubang ahensiya sa gobyerno aron mahatagan sa igong pagbantay ang katawhan nga mobisita sa ilang minahal sa kinabuhi nga mitaliwan na sa nagkadaiyang sementeryo sa maong mga adlaw.
Halos walay kabag-uhan sa ipatuman nga mga patakaran alang sa katawhan nga mosulod sa mga sementeryo, pribado man o pampublikong sam-ang.
Gidili ang pagdala sa mga dumuduaw sa bisan unsa nga kontrabando sama sa hinagiban, pusil, ilimnong makahubog, videoke machines og uban pa sa bisan asa nga sementeryo.
Giawhag ang publiko nga sundon ang mga patakaran aron masiguro ang pagmintina sa kahusay og kalinaw sa mga sementeryo.
