Naningkamot ang mga rescuer aron makabot sa mga residente nga na-stranded tungod sa kusog nga baha human sa pagbunok sa ulan gikan sa Severe Tropical Storm Kristine nga naglubog sa daghang mga barangay ug nagbilin ug 26 ka mga tawo nga nangamatay sa mga lugar sa Luzon.
Usa ka tambalanan sa lungsod sa Lemery, Batangas ang napugos sa pagsirado tungod ang mga ward ug emergency room niini gibahaan na.
Kapin sa 30,000 ka mga tawo ang napugos sa pagbakwit sa Bicol.
Sumala sa taho sa NDRRMC, nga kadaghanan sa mga nangamatay tungod sa pagkalumos ug pagdahili sa yuta.
Sa naasoy nga kamatayon, pito ang gikan sa Naga City, lima sa Catanduanes, upat sa Albay ug matag usa sa Camarines Norte, Camarines Sur, Sorsogon ug Masbate.
Sa Quezon province, usa ka tigulang nga babaye ang nalumos, samtang usa ka bata ang namatay usab human maabtan sa baha ug nahulog sa kanal.
Sa Planas, Masbate usa ka tawo ang namatay gumikan natumbahan ug sanga sa kahoy.
