Gipawalay sala sa Sandiganbayan Third Division karong adlawa si kanhi Senate president og karon Chief Presidential Legal Counsel nga si Juan Ponce Enrile alang sa kasong plunder.
Ang maong kaso may kalabotan sa P172-million plunder case nga gipasaka batok kanila nga adunay kalabotan sa pork barrel scam.
Lakip sa gipawalay sala sa Sandiganbayan ang kanhi chief of staff ni Enrile nga si Jessica “Gigi” Reyes og ang gikonsiderang Pork Barrel Queen nga si Janet Lim Napoles.
Base sa desisyon sa anti-graft court, gibutyag niini nga napakyas ang state prosecutors nga pamatud-an nga guilty si Enrile og uban pang akusado.
Napulo ka tuig midugay ang kaso human nga gibutyag sa Office of the Ombudsman nga paigo ang mga ebidensya aron pasakaan og kaso si Enrile, Reyes, Napoles, og uban pang indibidwal sa Sandiganbayan.
Giakusahan si Enrile nga sayop niining nagamit ang iyang Priority Development Assistance Fund.
Gikalipay usab sa kampo ni Enrile ang pagpawalay kaniya.
