Gisaway ni House Deputy Minority Leader ug ACT Teachers Rep. France Castro si Bise Presidente Sara Duterte tungod sa tapok sa mga problema nga iyang gibilin sa Department of Education, nga pagaabagahon sa nihulip kaniya nga si kanhi senador ug karon Secretary Sonny Angara.
Si Castro nipadayag sa iyahang kusog nga pagsaway atol sa pagdungog sa House Committee on Appropriations sa gisugyot nga P793.18-bilyon nga budget sa DepEd ug mga attached agencies alang sa 2025.
Ang Bise Presidente ni-resign isip DepEd secretary niadtong Hulyo 19 2024.
Daling gibalhin ni Castro ang iyang pagtagad sa mga problema nga napanunod ni Angara sa miaging administrasyon.
Gipunting niya nga ang kurikulum nagbutang ug daghang kabug-at sa mga magtutudlo sa highschool, nga karon adunay 7-8 nga load matag adlaw, nga ang matag klase molungtad og 45 minuto.
Dugang niini nga ang hinanaling pagrepaso sa MATATAG curriculum, nga matod niya dinali nga gipatuman mao nga daghang problema ang pagpatuman niini.
Dugang pa, gipasiugda usab sa magbabalaod ang mga seryusong problema nga natumbok sa report sa Commission on Audit (COA) kalabot sa DepEd Computerization Program (DCP).
Nipadayag usab og kabalaka si Castro sa kapakyas sa paghatod sa tukmang panahon sa mga remittance sa mga kawani sa ahensya nga niabot na og kapin sa P5 bilyon, apil na niini ang Bureau of Internal Revenue (BIR), Government Service Insurance System (GSIS), Philippine Health Insurance Corp. (PhilHealth), ug Pag-IBIG Fund.
Sumala sa COA report alang sa 2023, ang wala mabayri nga kontribusyon mikabat sa P1.3 bilyones nga utang sa BIR, P3.1 bilyon sa GSIS, P503 milyones sa PhilHealth, ug P182 milyones sa Pag-IBIG.”
Gitataw ni Castro nga dako kini og epekto sa mga magtutudlo ug non-teaching personnel ilabi na sa pagkalangay sa remittance sa GSIS nga mahimong moresulta sa pagbayad sa multa ug surcharges sa ilang accounts.
Si Angara ug ubang mga opisyal sa DepED nipasalig nga kadtong gitumbok sa COA, ilabina ang wala mabayri nga buhis, gitubag sa departamento, pinaagi sa nagpadayong reconciliation process.
