Gisugdan na ang diskusyon sa gisugyot nga nasudnong pundo para sa 2025 pinaagi sa briefing sa Development Budget Coordination Committee (DBCC).
Si Senate Committee on Finance Chairman Senador Grace Poe maoy nangulo sa diskusyon sa gisugyot nga P6.352 trilyon nga national budget alang sa sunod tuig.
Ang mga opisyal gikan sa Department of Budget and Management, Department of Finance, National Economic and Development Authority, Office of the President, ug Bangko Sentral ng Pilipinas didto sa DBCC briefing.
Matud ni Sen. Poe nga ilahang segurohon ang transparency, accountability, ug maalamon o makatarunganong paggamit sa mga kahinguhaan sa gobyerno.
Una nang gipahibawo ni Poe nga molungtad hangtod Oktubre 18 ang pagsusi sa proposed national budget.
Matod niya, plano nilang isumiter ang committee report sa 2025 national budget ug aprobahan ni President Ferdinand Marcos Jr. sa unang semana sa Disyembre.
Una nang gipasalig ni Senate President Francis “Chiz” Escudero nga mga ahensya lang nga nanginahanglan og confidential ug intelligence funds ang mahatagan niini.
Tungod kay ang pundo nga tukion mao ang budget sa eleksiyon, matod niya ilang siguroon nga dili kini magamit sa kampanya sa mga kandidato.
Dugang pa niini nga aduna usay balaod ug regulasyon sa Comelec aron dili magamit ang pundo sa gobyerno sa kampanya ni bisan kinsang kandidato.
