Nagtuo ang National Irrigation Administration (NIA) nga ang produksyon sa humay mas motaas pa sa 2025.
Matod ni NIA Administrator Aduardo Guillen, kini nunot usab sa pagsaka sa gidaghanon sa mga pasilidad sa irigasyon ug dam sa nasod nga makatabang sa pagpatubig sa mga humayan.
Gipakita sa opisyal ang mga bag-ong dam nga bag-o lang giablihan sa lainlaing dapit sa nasod sama sa Western Visayas, Cordillera, Central Luzon, ug uban pa.
Siya niingon nga kini makatabang sa pagpausbaw sa lokal nga industriya sa bugas uban sa tabang sa mga mag-uuma ug sa gobyerno.
Gawas niini, magamit usab ang bag-ong naugmad nga cropping calendar kung asa ang kasamtangang duha ka cropping season sa NIA-irrigated areas himoong tulo ka cropping seasons.
Gihisgotan usab sa NIA Administrator ang iyang giingon nga ‘incorporation’ o pagsulod ug pag-integrate sa konsepto sa irigasyon sa mga flood control projects sa Department of Public Works and Highways (DPWH).
Ubos niini, ang NIA ug DPWH naghiusa sa pagplano sa mga flood control facility nga gitukod diin ang tubig matigom sa maong mga pasilidad aron magamit sa mga umahan imbes nga ipaagi lang sa kadagatan ug suba.
Kahinumduman nga unang gipasigarbo ni PBBM ang moabot sa 5,500 ka mga flood control projects ug mga bag-ong dam nga gitukod ubos sa iyang administrasyon sa miaging SONA.
