Gitaho sa Philippine National Police nga adunay dakong pagkunhod ang natala nga mga krimen sa nasud sa nakalabay nga usa ka tuig.
Sa pagpamulong ni PNP chief Police General Rommel Marbil dungan sa gipahigayon nga seremonya alang sa ika-123 anibersaryo sa Police Service sa Camp Crame sa, Quezon city, gibutyag sa PNP chief nga miubos ang katibuk-ang crime volume sa nasud sa 14,666 sugod Hulyo 2023 hangtod Hunyo 2024 bunga sa mga inisyatibo sa law enforcement.
Sa iyang pamahayag, natala ang significant decrease sa rape, carnapping, robbery lakip ang 21.09% nga pagkunhod sa cybercrime incidents nga nagpakita nga epektibo ang gipaayo pa nga kapasidad og paningkamot sa kapulisan.
Gawas niini, gipasigarbo usab ni PGen. Marbil ang katibuk-ang P36.5 billion nga kantidad sa mga ilegal nga droga nga nakumpiska sugod Hulyo 1, 2022 hangtod Hulyo 31, 2024 lakip ang pinakadakong drug haul sa kasaysayan og pinakataas nga natala nga nakumpiska nga ilegal nga droga sa Alitagtag, Batangas nga P9.68 billion nga kantidad sa shabu kaniadtong Abril 2024.
Dinhi, gihingusgan sa PNP chief nga magpaiblin silang pursigido sa pagpreserba sa kinabuhi sa tawo ilawom sa “less-bloody” drug war sa Marcos administration.
Kahinumduman nga ilawom sa kasamtangang administrasyon, gipadayon ang kampaniya kontra ilegal nga droga apan sa ubang approach nga “less bloody” nga gisugdan ilawom sa liderato kaniadto ni kanhi PNP chief retired general Rodolfo Azurin Jr. nga gipadayon sa iyang mga successor.
