Nakatala ang Pilipinas og pinakapaspas nga paglambo sa ekonomiya niadtong ikaduhang kwarter sa 2024.
Sa usa ka press conference, gitaho ni National Statistician at PSA USec. Claire Dennis Mapa nga milambo sa 6.3% ang gross domestic product (GDP) o ang katibuk-ang kantidad sa goods og mga serbisyong na-produce sa nasud sugod Abril hangtod Hunyo sa kasamtangang tuig.
Mas paspas ang maong paglambo kumpara sa GDP growth rate nga natala kaniadtong unang kwarter sa 2024 nga anaa sa 5.8%.
Kini na usab ang gikonsidera nga pinakapaspas nga paglambo sa ekonomiya sa atong nasud sugod sa nakalabay nga lima ka quarters o sugod kaniadtong unang kwarter sa 2023 nga nakatala og 6.4%.
Samtang, nalabwan sa Pilipinas ang ekonomiya sa ubang mga nasud sa East Asia alang sa ikaduhang kwarter sama sa Malaysia nga anaa sa 5.8%, Indonesia nga anaa sa 5% og China nga anaa sa 4.7%.
Gumikan sa maong significant development, sumala kang National Economic and Development Authority (NEDA) Secretary Arsenio Balisacan nagresulta kini sa 6.0% GDP growth sa PH alang sa unang katunga sa tuig aron makab-ot ang target nga paglambo nga 6% hangtod 7% alang sa 2024.
