Lima ka kanhi opisyal sa Department of Transportation and Communication ug usa ka private businessman ang gihukman ug graft sa Sandiganbayan tungod sa anomalyang pagpalit ug mga mobile phone sa kantidad nga P5.96 milyon kaniadtong 2005.
Sa 172-panid nga desisyon nga gipagawas kaniadtong Hunyo 7, 2024, natumbok sa third division sa anti-graft court ang mga kanhi direktor sa DOTC nga silang Elmer Soneja, Venancio Santidad, Ildefonso Patdu Jr., ug Rebecca Cacatian; DOTC Legal Officer Geronimo Quintos; ug ang negosyanteng si Domingo Samuel Jonathan Ng ang nakasala sa pagsupak sa Section 3 (e) sa RA 3019 o ang Anti-Graft and Corrupt Practices Act.
Ang naasoy nga opisyal sa DOTC ang mga miyembro sa Bids and Awards Committee sa ahensya nga nag-apruba sa pagpalit luyo sa mga iregularidad.
Tanan gihukman ug unom hangtud napulo ka tuig nga pagkapriso nga may perpetual disqualification alang sa paghupot ug pampublikong katungdanan.
