GENERAL SANTOS CITY – Epektibo karong adlawa, Abril, 02, 2024 hangtud Abril 05, 2024 ang suspension of face-to-face classes gikan sa elementarya, sekondarya, kolehiyo apil ang Graduate studies sa mga pribado ug pampubliko nga tulunghaan.
Pinaagi sa Executive Order number 19 series of 2024 nga gipagawas ni Gensan Mayor Lorelie Pacquiao kini tungod sa nasinati-an nga hilabihan ka init sa panahon.
Apil sa maong kamandu-an ang pag-awhag sa mga tulunghaan nga magpahigayon na lamang ug online classes aron malikay ang mga magtutungha ug magtutudlo nga ma expose sa init nga panahon.
Una nga nanawagan ngadto sa taga Department of Education ang usa ka Konsehal sa syudad nga maghatag ug paigo nga tinubdan sa limpyo nga tubig mainum sa tanan nga tulunghaan sa dakbayan aron masiguro ang kahimtang sa mga magtutungha ug faculty batuk sa epekto sa sobrang kainit nga nasinati-an.
Kagahapon, Abril 01, 2024 nagpagawas ug advisory ang City Disaster Risk Reduction and Management Office nga nakatala ug 39.1 °C nga heat index ang syudad mga ala una sa hapon.
