Patay ang usa ka babaye samtang nasamdan ang kauban niini human nabanggaan sa usa ka puti nga van ang ilang gisakyang motorsiklo sa Purok Cacao, Barangay Kayupo, Kiamba, Sarangani Province, kagahapong adlawa Oktubre 12.
Giila ang mga biktima nga sila si Vincent Nicole Siloy, 22 anyos, residente sa Lun Padidu, Malapatan, Sarangani Province, ug si Desie Jane Bacali Madawe, 23 anyos, residente sa Purok Bolaong Exit, Barangay Labangal, General Santos City, nga maoy back rider sa motorsiklo.
Sumala sa inisyal nga imbestigasyon sa kapulisan, gikan sa Poblacion sa Kiamba padulong sa General Santos City ang motorsiklo nga gimaneho ni Siloy, samtang gikan sa General Santos City padulong sa Maitum ang wala pa mailhing puti nga van.
Pag-abot sa maong lugar, aksidenteng nasangit sa van ang wala nga bahin sa motorsiklo, ilabi na sa bahin diin nagsakay ang back rider.
Human sa insidente, mikalagiw dayon ang drayber sa van padulong sa wala mahibalhing direksyon ug gibiyaan ang mga biktima.
Gidala ang duha sa Dr. Cornelio Martinez Memorial Hospital, diin gideklarar nga dead on arrival si Madawe, samtang wala pa matino sa report ang kahimtang ni Siloy.
Samtang, gilusad na sa kapulisan ang hot pursuit operation ug nakig-alayon sa mga silingang police unit alang sa checkpoint operations aron masubay ug madakpan ang drayber sa van nga mikalagiw.
