GENERAL SANTOS CITY – Nakapuli na sa balay sa iyang Apuhan ang otso anyos nga bata nga napatay sa kulata sa iyang Amahan.
Kini human nakaabot pasado alas sais kagabii sa Barangay Fatima ang patay nga lawas sa otso anyos gikan sa usa ka punerarya.
Kahinumduman nga nangayo ug pasaylo sa iyang anak si Roy Canlaon Jr. 34 anyos human nahibaw-an nga namatay na ang anak.
Giangkon niini nga sangko sa langit ang pagmahay og kalagot sa kaugalingon human nawad-an ug anak tungod ra usab sa iyang gibuhat.
Sumala sa suspek nga wala tuyu-a ang nahitabo dungan sa pag-angkon nga naka-inom niadtong tungura.
Giangkon usab nga gapamunal siya sa iyang mga anak apan sa nahitabo karon, nasobrahan ang pagpangulata human gihimakak nga wala gagamit og ilegal nga droga niadtong tungura.
Una nga gibutyag ni Police Major Wesley Matillano, hepe sa Fatima Police Station nga walay unsa mang rekord si Canlaon sa ilang estasyon kalabot ang paggamitan og droga apan nasayran nga may rekord ang suspek sa barangay sa pagpangulata sa iyang mga anak inig mahubog ang nasampit.
Gani naabtan sa nagresponde nga imbestigador sa Womens and Childrens Desk nga giunlanan sa suspek ang lipong niini nga anak sulod sa ilang gipuy-an.
