ALABEL, SARANGANI- Nagreklamo sa kapulisan ang usa ka amahan human giingong gikulata sa upat ka estudyante ang iyang anak sulod mismo sa classroom sa Tukwal National High School sa Alabel, Sarangani Province, tungod sa giingong diskriminasyon sa iyang tribu nga Blaan.
Sumala kang Junjun Samson, amahan sa bata nga nahibaloan na lamang niya ang insidente sa pag-uli sa iyang anak gikan sa eskwelahan. Natingala usab siya kay tunga ra sa adlaw nakasulod sa klase ang bata.
Matod pa ni Samson, gisumbag sa nawong ang iyang anak samtang nagsulat lamang sulod sa classroom. Giingong giinsulto usab ang biktima tungod sa iyang pagkahisakop sa tribu nga Blaan.
Dugang pa niya, namula ug naghubag ang dalunggan sa bata, nga maoy hinungdan sa kalisod niini sa pagkatulog. Plano usab niyang iptan-aw sa doktor ang kahimtang sa iyang anak.
Tungod niini, mihangyo si Samson sa kapulisan ug sa mga magtutudlo nga imbestigahan pag-ayo ang insidente ug palig-onon ang pagbantay sa mga estudyante sulod sa kampus aron malikayan ang pagpang-bully ug diskriminasyon, ilabina batok sa mga estudyanteng lumad.|Report by Bombo Irish Losorata
