GENERAL SANTOS CITY – Magpatawag gihapon ug consultative meeting ang Konseho sa Dakbayan human nagka-atubang ang miyembro sa mga sidewalk vendor sa may Santiago, Lagao ingon man ang taga buhatan sa DPWH atol sa Sesyon kagahapong adlawa kabahin kini sa pag demolish sa ilang lugar sa miaging adlaw.
Saysay ni Roderic Ian Salvido, Representate sa DPWH Gensan District nga aduna nay kasamtangan nga mga proyekto ang ilang buhatan susama sa konstruksyon sa mga bike lanes ug mga irigasyon kung asa maapektuhan ang nahisgutang mga sidewalk vendors sa lugar.
Kahibaluan nga daan na usab silang gipahimangnuan sa mga opisyales sa Brgy. Lagao apan miabot pa sa pag demolish.
Base usab sa mga mitambong nga myembro sa sidewalk vendor, angayan matud pa nga hatagan sila ug luna sa Barangay gumikan dugay na usab sila nga naka pwesto sa maong lugar.
Samtang, depensa ni Kap. Rolito Blando sa Brgy. Lagao nga siya ang maipit kung singlon na siya sa taga DPWH sa panahon nga magsugod na sila sa ilang mga proyekto.
Sa katapusan, gipasabot ni Vice-Mayor Rosalita Nuñez nga magpatawag pag-usab ug consultative meeting aron nga hatagan ug komprehensibong solusyon ang nahitabo nga demolisyon.
