GENERAL SANTOS CITY – Hapsay og malinawon ang nahimong unang adlaw sa pagbalik sa klase alang sa school year 2022-2023.
Kini ang gibutyag ni Romelito Flores, Schools Division Superintendent sa DepEd GenSan human nga milibot sa pipila ka pampublikong tulunghaan sa dakbayan.
Matud niini, may mga gagmay nga kakulian nga natigayon lakip ang wala pagtuman sa health protocol kung asa wala malikayan ang pagdug-ulay sa mga bata, aduna gihapon pipila ka ginikanan ang nag-enroll sa ilang anak, samtang may mga nagkuha og certificate of enrollment nga gamiton sa pagkuha og educational cash assistance sa DSWD.
Apan giklaro ni Flores nga kini nga mga sitwasyon ang ‘manageable’ og wala maka-apekto sa katibuk-ang dagan sa pag-abli sa klase ning adlawa.
Dugang ni Flores, depende kung unsa nga learning modality ang ipatuman tungod sila ang nasayod sa sitwasyon sa ilang sa eskwelahan kung asa magbase sa ihap sa ilang mga estudyante. Awhag pa niini sa mga estudyante nga sundon ang mga health protocol aron makalikay sa pagtakod sa covid 19.
Kabahin sa nahitabo sa Alabel Central Integrated SPED Center, sumala pa ni Flores nga wala nahitabo dinhi sa dakbayan nga sa usa ka magtutudlo anaa sa 90 ka enrolees ang gihuptan.
