GENERAL SANTOS CITY | Daghan nga mga panghitabo sa syudad nga personal nga gibisita ni kanhi Presidente Fidel Ramos panahon nga si Rosalita Nuñez mao pa ang Mayor sa syudad. Usa-usa nga giasoy ni Vice Mayor Nuñez nganong nahimong paborito siya kauban ni Jess Robredo sa kanhi Pangulo. Pagsaysay niini nga classmate sila ni Ramos sa Master in National Security Administration hangtud nagtungha ug Doctorate hinungdan nga ginatawag siya ni Ramos nga Doctor Nuñez. Usa matud pa ka workaholic si Ramos ug kanunay siyang ginapaalerto pinaagi sa fax message ug ginapangutana kalabutan sa mga panghitabo.
Usa sa nahinumduman sa kasamtangang Vice Mayor sa dakbayan nga si Ramos usa sa mga sundalo sa Pilipinas nga miapil sa Korean war. Usa sa dili makalimtan ang pagbisita sa pangulo dinhi sa syudad dihang personal nga gisuta ang mukapin saysenta ka mga biktima nga anaa sa hospital nga naigo sa pagbuto sa granada sa campaign rally nilang Nuñez ug ang Pangulo maoy mitubag sa wala nabayaran nga hospitalization nga mukapin usa ka milyon ka pesos. Sa mao matud pa nga adlaw may meeting si Ramos kang Cardinal Sin apan iya kining gibiyaan ug miadto sa dakbayan.
Pinaagi matud pa kang Ramos napadayon sa syudad ang Makar port, Gensan Airport ug Fishport nga gisugdan ni President Cory Aquino ug ang pag host sa Gensan ug Palarong pambansa.
Nasuta nga ang mga residente nga biktima sa pagbusikad sa granada ang nagbunyag sa 39.2 village nga ipangalan kang President Fidel Ramos mao nga gitawag kini ug FVR village.
