GENERAL SANTOS CITY – Malaumon si Allan Marcella, labaw sa City Environment and Natural Resources Office kon CENRO GenSan nga dili dugayon ang pag award sa mudaug nga kontraktor aron masugdan na ang pag-develop sa Queen Tuna Park nga giila usab nga peoples park.
Matud pa ni Marcella nga anaa sa P22 million ang unang pondo nga gitagana alang sa pagpaanindot sa maong lugar.
Gikadugang niini nga naghinam hinam na sila nga makita ang bag-ong panagway sa Queen Tuna park nga usa ka anindot nga dapit nga makumpara sa bag-ong Manila bay.
Matud niini nga ilang nang ipakita sa publiko ang approved nga proposed Queen Tuna Park Project Development Masterplan.
Gidesenyo kini ang masterplan nilang Architect Micheal Ang og mga kauban .
Pinasibu ang desenyo base sa no-built-zone restrictions sa Sarangani Bay Protected Seascape law, GenSan East Coast Ecotourism Management Plan, Protected Area Management Plan sa Sarangani Bay Protected Seascape.
Apil sa plano nga paaninduton ang daplin sa baybay sa Purok Tinago hangtud sa bukana sa Purok San Juan Silway barangay West.
