GENERAL SANTOS CITY – Mas gipahugtan pa karon sa mga local officials sa Barangay Tambler ang pagpatuman sa gitakdang minimum health standards sa tanang mga beach resorts nga anaa sa ilahang area of responsibility, kini human sa natigayong kasamok sa Dolores Tropicana Beach Resort.
Matud ni Kapitan Abdul Wahid Bualan, kini aron dili na masubli ang nahitabo sa maong kaliguanan nga wala niya damha nga mahitabo.
Aminado nga gihatagan niya ug permiso ang maong reggae night jam apan hugot niining gipahinumdom sa tigdumala sa beach resort og organizer nga sundon ang mga minimum health protocol.
Lauman ang presensya sa mga tanod sa mga beach resorts og establisyemento nga nahisakop sa Brgy. Tambler human nga gimando sa kapitan nga adlaw adlawon ang inspeksyon.
Apil usab sa trabaho sa mga barangay tanod ang pagtutok sa pagsulod sa mga menor de edad sa maong mga beach resort, diin usa sa mga ginabawal sa balaud sa siyudad.
