GENERAL SANTOS CITY – Nakiglambigit karon ang kapulisan sa mga establismento sa Nuñez St. Brgy, San Isidro ning syudad partikular kung asa gipusil ang kanhi municipal councilor sa Palimbang, Sultan Kudarat nga si Ibrahim Kadil Sabiwang, 53 anyos.
Nasuta nga gawas sa balay sa Palembang Sultan Kudarat may balay usab ang biktima sa Isabela Homes Barangay San Isidro ning syudad.
Matud ni Police Major Brent Ian Salazar, Hepe sa San Isidro Police Station, ang makuha sa mga imbestigasdor nga kopya sa CCTV sa mga establisiemento palibot sa crime scene posibleng magamit sa imbestigasyon nga makatabang usab sa posibleng ilhanan sa mga suspek.
Subay sa pamahayag sa mga nakakita, usa ka MIO nga itom ang gisakyan sa riding in tandem criminal.
Pulitika ang usa sa mga anggulong gitan-aw sa kapulisan sa pagpamusil sa biktima apan dili pa kini makumpirma sa kapulisan hangtud nga dili makuha ang pamahayag gikan sa pamilya nga mihangyo nga mukooperar sa imbestigasyon pagkahuman malubong ang biktima.
Kahinumduman nga alas 4 pasado ang takna sa hapon sa miaging adlaw dihang gipusil ang biktima sa Nuñez St. Brgy, San Isidro pipila na lang ka metros ang gilay-on gikan sa San Isidro Police Station.
Narekober sa crime scene ang mukabat sa onse ka basyo sa kalibre 45 nga armas nga maoy gigamit sa pagpamusil.
