GENERAL SANTOS CITY – Patay ang purok chairman samtang walo pa ang naadmit gumikan sa diarrhea nga nasinati-an sa Barangay Upper Suyan, Malapatan, Sarangani Province.
Matud ni Mayor Jun Sumbo nga nagpahigayon na ug assessment sa lugar ang mga medical team nga gipadala sa lokal nga gobyerno.
Giila niini ang namatay nga si Francisco Managka , ang purok chairman sa Sitio Anduway sa nahisgutang barangay.
Usa sa gitudlong hinungdan sa pagsakit sa tiyan sa mga residente ang tubig nga giinum sa mga residente.
Matud ni Sumbo nga ang tinubdan sa tubig sa lugar gikan sa mga atabay nga nahimutang kilid usab sa sapa.
Gani may gihimo na ang Municipal Health Office aron maundang na ang nasinati-ang diarrhea.
Giangkon sa mayor nga may susama nga kaso na nga nahitabo kaniadto sa Lower Kyugam ug Sitio Kakub nga sakop usab sa Upper Suyan.
Gipasusi usab sa Municipal Health Office kang Kapitan Boyet Ogan ang paggamit sa mga residente ug matang sa sagbot nga gihimo nga tambal aron mawala ang pagsakit sa tiyan sa mga residente.
