GENERAL SANTOS CITY – Padayon ang gihimong imbestigasyon sa kapulisan sa posibleng motibo ug kung si kinsa ang posibleng naghimo sa pagpamusil-patay sa usa ka lalaki nga ahente og motor sa may Purok Vista, Lot 42, Alilia Village Barangay Sinawal, ning syudad.
Ang biktima giilang si Matabalao Montañer, 30 anyos , minyo nga residente sa nasampit nga lugar.
Sa inisyal nga imbestigasyon sa kapulisan sa San Isidro, namalit ang biktima sa sari sari store nga duol lang sa ilang pinuy-anan dihang usa ka lalaki nga nakasul-ob ug bull cap og may tabon sa nawong ang miduol og gipusil ang biktima
Misibat ang suspek sakay sa usa ka puti nga XRM nga walay plate number.
Base sa mga testigo nga ang suspek ang 5’9 ang katas-on og wala mailhan sa mga tawong nakakita sa pagpamusil.
Blangko karon ang pamilya sa motibo sa krimen.
Matud sa amahan sa biktima nga wala kini nasayran nga adunay nasuko sa iyang anak og may kalambigitan sa ilegal nga gimbuhaton.
Nasuta nga diha-diha nga namatay ang biktima human nga nakaangkon ug ubay-ubay nga igo pinusilan sa ulo.
Narekober sa kapulisan sa crime scene ang unom ka mga basyo sa gituuhang kalibre 45 nga armas ug duha ka slug.
