64 ka mga baboy gipailawom sa culling sa Glan

GENERAL SANTOS CITY – Mukabat sa 64 ka mga buhing baboy ang gipailawom sa culling o pagpatay tungod apektado sa African Swine Fever (ASF) sa Glan Sarangani Province.

Mismong si Glan Mayor Vivien Yap ang nanguna sa gipahigayong culling.

Gibutyag niini nga usa lang ka barangay nga adunay nagbuhi og mga baboy ang naigo sa ASF hinungdan nga walay angayang kabalak-an ang kasikbit nga mga barangay sa Kablalan.

Sa pamahayag pa ni Mayor Yap, nagpahigayon na sila og disinfection sa mga lugar kung asa natumbok nga naigo sa maong sakit sa baboy.

Gitambagan ni Mayor Yap ang mga residente sa Glan nga adunay binuhi nga mga baboy nga gilayong i-report kanila kung adunay duda nga naigo sa ASF ang ilang mga baboy sa ilang lugar aron gilayong maaksyunan.