GENERAL SANTOS CITY – Hugot ang gihimong contact tracing sa lokal nga gobyerno sa GenSan kauban ang munisipyo sa Polomolok, South Cotabato.
Kalabutan kini sa usa ka 61 anyos nga lalake nga security guard nga positibo sa COVID 19.
Gibutyag nga ang maong tawo ang miabot sa Polomolok nga gikan sa Calamba, Laguna sa miaging Hunyo 30, 2020 kung asa gipailawom sa 14 ka adlaw nga quarantine.
Sa miaging Hulyo 13, 2020 nakahuman na sa iyang quarantine nga walay rapid o swab test nga gipahigayon.
Ang nasampit ang nagpuyo sa iyang mga kabanay sa Polomolok sulod sa lima ka adlaw.
Nasayran nga sa miaging Hulyo 18, 2020 gipadala sa iyang employer sa GenSan nga magtrabaho isip night shift guard sa usa ka local motorparts shop sa Lagao.
Gibutyag nga Agosto 6, 2020 nakasinati ang maong pasyente sa sintomas sa COVID 19 nga nagpadayon gihapon sa pagtrabaho.
Samtang Agosto 10, 2020 gumikan sa dili maayong paminaw sa panglawas, nagpakonsulta sa Polomolok Health Center.
Ang nasampit ang gipilawom sa swab test kung asa gidala sa barangay Isolation Unit.
Ang resulta ang migawas Agosto 11, 2020 kung asa nagpositibo ang nasampit.
Nasayran nga ang pito nga may direct contact sa nasampit ang hugot nga gimonitor usab ang ilang kahimtang.
