GENERAL SANTOS CITY – Nagpahimangno ang Comelec sa publiko sa nahibiling adlaw para sa voters registration sa Barangay og Sangguniang Kabataan elections. Kini luyo sa pagpursige sa pipila ka magbabalaud nga subling masuspenso ang eleksyon sa sunod nga tuig og ipahigayon na lang kini sa 2022.
Matud pa kang Atty. April Mitchor-Miguel sa Comelec GenSan nga karong adlawa, September 28, ang ulahing Sabado sa voter registration samtang sa September 30, Lunes ang ulahing adlaw sa pagparehistro.
Gilauman na ang pagdagsa sa mga buot nga magparehistro karong adlawa og sa Lunes.
Apan gisiguro ni Atty. Miguel nga andam ang ilang buhatan sa maong sitwasyon. Alayon niini, nagpagawas og kamanduan ang Comelec nga naglatag sa patakaran nga sundon sa ulahing adlaw sa voter’s registration.
Una, kung maabtan og alas 3:00 sa hapon, tanang aplikante nga anaa sa 30-meter radius gikan sa office of the election officer dawaton ang aplikasyon.
Ikaduha, angayang anaa sa linya ang nagparehistro kung gitawag na ang pangalan.
Ikatulo, kung natawag ang pangalan angayang makapa-biometrics.
Magbutang usab og express lanes ang Comelec para sa mga edaran, PWds ug buntis. Sa datos sa komisyon mukabat na sa 2.6 milyon ang mga bag-ong nagparehistro.
