GENERAL SANTOS CITY – Gisiguro ni City DILG Director Atty. Rilimin Sandoval na halos nakumpleto na sa LGU-GenSan ang pag-comply sa kamanduan ni Pangulong Rodrigo Duterte nga kinahanglang limpyohan ang mga kadalanan gikan sa mga obstruction.
Matud pa niini, na-inspeksyon na sa grupo nga gilangkuban sa DILG, PNP, BJMP, BFP, CSO ug media ang mga kadalanang kinahanglang malimpyohan sa unsa mang sagabal.
Dihang gimando sa pangulo ang road clearing activity sa mga LGU’s, gilayong mituman ang syudad kung asa gihinloan ang mga kadalanan sa unsa mang nakaharang nga hinungdan sa huot nga dagan sa trapiko.
Sama sa J Catholico Avenue, Magsaysay, Cagampang Street, Purok Islam sa Brgy Dadiangas South, palibot sa palengke og sa uban pang dapit.
Samtang ginahulat pa gikan sa Central Office sa DILG ang validation score card subay sa pagtuman sa mga LGU’s sa maong kamanduan.
Nasayran nga 60 ka adlaw ang gihatag sa DILG sa mga LGU’s sa pag-comply sa road clearing operations sugod Agosto hangtud katapusan sa Setyembre.
Gikabutyag nga wala nay gihatag nga lugway ang DILG aron sundon ang maong kamanduan.
