GENERAL SANTOS CITY – Gipapaamping gihapon sa City Disaster Risk Reduction and Management Office(CDRRMO) ang mga residente sa GenSan og Sarangani Province tungod gihapon sa maut nga panahon.
Halos 70 pamilya ang nawad-an og balay human nga gihapak sa dagkong balud og kusog nga hangin epekto sa bagyong Marilyn.
Walo ka barangay sa syudad ang gilunopan tungod sa kusog nga pag-ulan nga gilangkoban sa mga barangay sa Dadiangas West, Labangal, Bula, Baluan, Buayan, Lagao, Apopong og City Heights.
Nasayran nga gisuspendi kagahapon ang klase sa mga estudyante sa GenSan human nga gibahaan ang mga tulunghaan.
Gisulod sa tubig-baha ang mga classrooms og uban pang pasilidad.
Hangtod karon gibahaan gihapon ang pipila ka kalsada nga anaa sa ubos nga bahin sa syudad.
Samtang, gikumpirma ni Rene Punzalan sa Provincial Disaster Risk Reduction and Management Office(PDRRMO) sa Sarangani Province nga unom ka balay ang naguba human nga natumbahan og lubi og suwerteng walay nasamaran sa insidente.
Gikan sa New La Union, Maitum Sarangani, gihikling ang mga pamilya sa luwas nga lugar.
