GENERAL SANTOS CITY – Hugot nga nakaalerto ang mga otoridad sa GenSan Oval Plaza ug sa palibot sa lugar tungod sa posibleng bahad matud pa sa pag-angkon ug kasamok dungan sa ipahigayong synchronized prayer rally sa Kabus Padatuon o KAPA Community Ministry International Inc. ning adlawa.
Una niini, nagpakaluoy nga nanawagan si KAPA founder Joel Apolinario sa iyang mga miyembro nga makighiusa sa maong panagtigom.
Apan dili sama sa unang natigayong prayer rally sa miaging semana, base usab sa mga social media posts, pipila na lamang ang nagpadayag nga musalmot.
Gibutyag mismo ni Geraldine Zamora labaw sa Business Permits and Licenses Division nga walay gi-isyu nga business permit ang ilang buhatan alang sa KAPA.
Samtang, nadugangan pa ang ihap sa KAPA member nga nagpatabang sa Bombo Radyo GenSan.
Midangop sa sibyahanan ang usa ka senior citizen nga lalaki, taga Malungon, Sarangani aron magpatabang alang sa angayang himuon aron makuha ang iyang P150,000 nga gi-invest sa naasoy’ng ivestment scam.
Giangkon niini nga gisayangan siya dihang nag-invest sa KAPA tungod ang maong salapi dugay na nilang tinigom sa iyang asawa.
Hinungdan nga desidido kining magpasang-at ug reklamo kang Pastor Apolinario aron mabawi ang ilang salapi.
Kahinumduman nga hilabihan kadaghan sa mga miyembro ang nadismaya dihang gipalaum lamang sila ni Apolinario dihang gipasaligan sila niadtong unang prayer rally nga ibalik ang operasyon sa KAPA.
Kini human matud pa gibawi ni Pangulong Rodrigo Duterte ang mando niini nga pasiradhan ang KAPA.
Apan nailad lamang mga miyembro human nga sila mismo ang nakadungog sa pahayag sa Pangulo nga usa ka ‘continuing crime’ ang operasyon sa KAPA hinungdan nga pasiradhan.
