GENERAL SANTOS CITY – Gilaumang subling mahisgutan ni Pangulong Rodrigo Duterte ang kalabot sa gimando niyang pagpasirado sa Kabus Padatuon o KAPA Community Ministry International Inc., atul sa kaniyang pagbisita sa siyudad ning adlawa, June 13.
Kini gumikan natunong ang schedule sa prayer rally sa mga miyembro sa nasampit nga investment scam ning adlawa nga ipahigayon sa Antonio Acharon Sports Complex sa Brgy Calumpang ning siyudad, sa pagbisita sa pangulo nga ipahigayon sa GenSan Gymnasium sa Brgy Lagao, aron mang-apud-apod ug 13,000 ka land titles sa mga agrarian reform beneficiaries.
Una nang gipasalig sa General Santos City Police Office nga “in place” na ang ipatuman nga hugot nga seguridad ning adlawa katambayayong ang AFP, aron dili makaduol ang mga KAPA members sa pangulo.
Samtang, wala pa masiguro kon makatambong ang founder sa nasampit nga investment scam nga si Joel Apolinario sa ilang prayer rally.
Kini tungod wala gihapon nasayran ang gikahimutangan niini, human gi-raid sa National Bureau of Investigation ang mga KAPA offices sa nagkalain-laing lugar sa nasud, apil ang buhatan sa uban pang mga investment groups, apil ang panimalay ni Apolinario dinhi sa siyudad kaniadtong Lunes.
Una nang gibutyag sa Securities and Exchange Commission (SEC) ug NBI nga patung-patong nga kaso ang atubangon ni Apolinario ug mga opisyal sa KAPA human napamatud-an nga investments ug dili donasyon ang operasyon niini, nga pagsupak sa Securities Registration Code of the Philippines.
