GENERAL SANTOS CITY – Mukabat sa lima ka dumptruck ang nahakot sa Waste Management Office (WMO) nga mga campaign paraphernalia sa gihimo nilang pagpanglimpyo kaniadtong Biyernes.
Nagpasalamat si Nonoy Pareja, ang labaw sa WMO sa tanang mitabang aron tanggalon ang mga election materials sama sa tarpaulins, poster og daghan pang gigamit atol kaniadtong eleksyon.
Gibutyag niini, wala pay labot ang nahakot sa laing grupo nga nanghinlo usab sa mga kalat og basura niadtong piniliay.
Kahibaluan nga lakip ang mga barangay kapitan, mga pulitiko og ang ubang grupo ang mitabang sa clean-up drive nga gihimo.
Sa pahayag ni Pareja nga ang mga campign materials nga anaa sa main roads og sa mga kalye ang ilang giuna paglangkat.
Gibutyag ni Pareja, ang mga mapuslan nga mga tarpaulins ang ilang gihipos tungod ang likod nga bahin ang pwedeng masulatan og mga impormasyon o pahimangno nga ipadangat sa publiko.
Samtang ang mga nangagisi ang gidala sa Sanitary Landfill sa Barangay Sinawal ning syudad aron maoy gamiton sa paghimo og bricks.
Gidayeg ni Pareja ang mga pulitiko bisan kadtong pildido sa eleksyon nga mitabang sa paghipos sa mga basura kaniadtong eleksyon.
