GENERAL SANTOS CITY – May mga lugar sa Region 12 nga gikonsiderang hot spots atol sa election.
Sa pakighinabi sa Bombo Radyo GenSan, gibutyag ni PNP 12 Spokesman Lt. Col Aldrin Gonzales nga kini mao ang Cotabato City nga may nahitabo sa miaging katuigan nga dili maayo ang dagan sa election.
Lakip usab ang Kiamba, Sarangani Province tungod sa natigayong mga pagpamusil patay sa mga pulitiko sa miaging mga katuigan.
Gitutukan usab ang ubang mga lugar sa North Cotabato tungod sa isyu sa mga private armed groups.
Nasayran nga kapin sa 100 ka pulis ang nakahuman na sa ilang training nga magsilbing miyembro sa Board of Election Inspectors kon BEIs alayon sa Mayo 13, 2019 midterm elections.
Ang mga nasampit nga mga pulis ang may ranggo nga patrolman o patrolwoman nga mupuli kon muatras ang mga magtutudlo nga BEIs sa pagserbisyo sa election nga ang kasagarang rason gumikan sa kagubot.
Gibutyag pa ni Gonzales nga andam gihapon ang PRO-12 nga magdugang og pulis nga bansayon nga magsilbing BEIs.
