GENERAL SANTOS CITY – Luwas na ang kahimtang sa usa ka pulis human aksidenteng naigo sa pusil sa iyang kauban nga pulis human nga gisulayan ug ilog sa suspek nga ilang gisilbihan ug warrant of arrest.
Giila ang nasamdan nga pulis nga si P/Cpl. Jessie Dasmariñas, kung asa kauban niining nagsilbi ug mandamiyento de arresto si Patrolman Kelvin Asuzena, batok sa usa ka Jimmy Balunto alias Jun, 45-anyos, taga-Amsipit, Maasim, Sarangani Province, gumikan sa kasong lugos.
Mipalag matud pa ang suspek dihang arestuhon na, ug gisulayan ug ilog ang pusil ni Patrolman Asuzena.
Nag-iluganay ang duha sa pusil hinungdan nga aksidenteng mibuto og naigo sa kamot ang suspek samtang milahos ang bala sa paa ni Cpl. Dasmariñas.
Gi-turnover na sa Maasim Municipal Police Station ang suspek, samtang ang nasamdan nga pulis ang kasamtangang gapaayo sa balay-tambalanan.
