Gitugyan sa usa ka miyembro sa CAA-CAFGU ngadto sa kapulisan ang 20 anyos nga suspek sa pagpangawat og kwarta sulod sa usa ka balay sa Sitio Glamang, Barangay Datal Anggas, Alabel, Sarangani Province, udto niadtong Oktubre 10, 2026.
Giila ang biktima nga si Marelina Baran Salimama, samtang ang suspek mao si Franco Sumaya Calibay, ulitawo ug residente usab sa maong lugar.
Base sa inisyal nga imbestigasyon sa Alabel Municipal Police Station, nahitabo ang pagpangawat pasado alas-diyes sa buntag sa maong adlaw, diin giingong gisulod sa suspek ang balay sa biktima pinaagi sa pagguba sa bungbong nga hinimo sa gaan nga materyales.
Gikuha niini ang kwarta nga mikabat sa walo ka libong pesos nga gibutang sulod sa kabinet sa master bedroom sa biktima.
Sumala sa kapulisan, ang maong kwarta narekober gikan sa pagpanag-iya sa suspek sa dihang nadakpan kini ug gibalik dayon ngadto sa tag-iya.
Gitugyan ang suspek ni Biro Lagingan Sumaya, 30 anyos, usa ka miyembro sa CAA-CAFGU nga naka-assign sa Barangay Datal Anggas, ngadto sa Alabel MPS pasado alas-12:45 sa udto.
Sa pagkakaron, anaa na sa kustodiya sa kapulisan ang suspek human sa booking procedure ug medical examination samtang giandam ang mga dokumento alang sa pagpasaka sa angay nga kasong kriminal batok kaniya.
