GENERAL SANTOS CITY – Gikatakdang bisitahon sa mga sakop sa Presidential Task Force on Media Security(PTFOMS) ang mass grave sa Maguindanao massacre victims sa Forest Lake Cemetery sa Brgy. Apopong, ning syudad.
Dungan kini sa ika-9 anibersayo sa Maguindanao massacre sa Nobyembre 23, 2018 kung asa pangunahan ni Undersecretary Joel Sy Egco, Executive Director sa PTFOMS ang pagbisita sa lubnganan.
Makigdayalogo kini sa mga pamilya sa 12 ka mamahayag nga lakip sa namatay sa masaker nga gilubong sa maong sementeryo.
Una niini, mutambong si Exec. Dir. Egco sa ‘Media Safety and Security’ forum kung asa kini ang mamahimong nag-unang dinapit bisita.
Pangunahan sa SOCCSKSARGEN PRESS CLUB ang media forum nga gilauman nga tambungan sa local journalist gikan sa SOCSKSARGEN region og mga representante gikan sa PNP, PDEA, Department of Justice, Comelec og hudikatura.
Samtang, usa ka media solidarity and fellowship ang ipahigayon sa gabie nga tambungan usab sa local media practitioners og mga miyembro sa pamilya sa Maguindanao massacre victims.
Kahinumduman nga anaa sa 58 katao lakip niini ang 32 ka media workers ang namatay sa Ampatuan massacre niadtong Nobyembre 23, 2009 sa Ampatuan, sa probinsya sa Maguindanao.
