Nagkasangka ang duha ka armadong grupo nga miyembro sa MILF sa utlanan sa Sitio Tubak, Barangay Pagangan, Aleosan, Cotabato ug Barangay Bualam sa SGA BARMM alas dos sa hapon karong adlawa Nobyembre 11.
Sa report sa Aleosan Municipal Police Station, giila ang mga grupo nga sila Montaser Palencia, alyas Montassir Nunongan, sakop sa 105th Base Command sa MILF ubos ni Commander Bravo, ug ang grupo ni Esmael Macasasa nga sakop sa MILF National Guard.
Gisubay sa kapulisan nga nagsugod ang panagbangi tungod sa pagpamusil sa maong lugar niadtong Nobyembre 10 nga miresulta sa pagkamatay sa duha ka menor de edad.
Gipadala na sa lugar ang mga personahe sa kapulisan ug Armed Forces of the Philippines o AFP aron magpatrolya ug maglikay sa posibleng sunod nga engkuwentro.
Naa usab sa lugar ang mga opisyal sa lokal nga kagamhanan, barangay ug mga Muslim elder aron mamagitan ug sulbaron ang panagbangi sa duha ka grupo.
