GENERAL SANTOS CITY – Hugot nga gisuportahan sa Socsksargen Press Club ang inisyatibo sa Presidential Task Force on Media Security nga magpahigayon og imbestigasyon may kalabotan sa pag-aresto sa NBI sa duha ka Bombo Radyo personalities og gipasakaan og kaso.
Sa gipagawas nga opisyal nga pahayag sa Socsksargen Press Club, angayan matud pa nga patas, walay dapigan og walay bisan kinsa nga maka-impluwensiya sa PTFoMS sa pag-imbestiga sa maong insidente.
Sama sa uban, adunay katungod sa ‘due process’ si Mr. Jonathan Janjan Macailing, station manager og Mr. Salvador Boi Galano, news director kung asa nagpabiling inosente hangtud nga wala pay gipagawas nga desisyon ang korte may kalabotan sa gipasaka nga kaso batok kanila.
Nag-ugat kini sa pagkomentaryo sa sibyahanan sa self proclaimed Modern Moses nga si Pastor Joel Apolinario. Ang kalihokan sa lider sa KAPA (Kabus Padatuon) Community Ministry International Inc giakusahan sa kalambigitan niini sa investment scam.
Ang modus operandi niini mao ang magkolekta og salapi nga donasyon matud pa alang sa ilang ministeryo bugti sa ilang investment share o tubo.
Sa bahin nilang Bombo Jan jan og Bombo Boi, hugot nga gipanghimakak ang alegasyon ni Apolinario nga nagpasuhol o midawat og salapi inay si Apolinario hinuon ang kadaghang higayon nang gisulayan nga manuhol kanila.
Hinuon, gihingusgan sa Socsksargen Press Club nga isip media practitioner mudapig og mubarog kini alang sa kamatuoran.
