GENERAL SANTOS CITY – “Purely harassment.” Kini ang unod sa gipagawas nga official statement sa Kapisanan ng mga Brodkaster sa Pilipinas(KBP) SOCSKSARGEN Chapter may kalabotan sa alleged robbery extortion nga gipasaka kang Mr. Jonathan “Janjan ” Macailing og Mr. Salvador “Boi” Galano sa Bombo Radyo GenSan.
Sa statement ni Netnet Ortiz, KBP Chapter Chairperson, gibutyag niini nga biktima sa frame-up charges ang duha ka Bombo personalities.
Sa iyang pahayag, ang grabeng pagbatikos sa Bombo sa pyramiding scam nga KAPA (Kabus Padatoon) ang nagtukmod sa founder niining si Joel Apolinario nga pahilumon ang sibyahanan pinaagi sa frame up charges.
Bag-ohay lang dihang nasayran sa KBP nga una ang gipahigayong entrapment operation sa Bombo personalities, pipila ka higayon nga misulay si Apolinario nga manuhol sa taga Bombo apan hugot nga gibarugan sa sibyahanan nga mudapig sa kamatuoran alang sa interes sa publiko.
Sa pahayag ni Ortiz, ang unsa mang komentaryo/ opinyon sa Bombo Radyo may kalabotan sa KAPA walay gisupak sa asa mang probisyon ilawom sa patakaran og polisiya sa KBP. Gihingusgan niini nga ang nahitabo kanilang Bombo Janjan ug Bombo Boi dili lamang nakaapekto sa Bombo Radyo inay sa tibuok media community sa SOCSKSARGEN.
Miapela usab ang KBP SOCSKSARGEN Chapter sa mga opisyal sa Sarangani Province partikular sa Sangguniang Panlalawigan og uban pang investigating government agencies nga imbestigahan ang ‘bogus’ og ilegal nga operasyon sa mga negosyo ni KAPA founder Joel Apolinario nga matud pa nag-atubang sa patung patong nga kasong estafa sa Bislig Surigao del Sur.
Kahinumduman nga sa presscon nga mismong si Apolinario ang nagpatawag, gibutyag niini nga daghan siya og negosyo apan nasayran sa KBP nga walay tukmang permits ang tulo ka units sa fishing boat og pito ka pump boats sa LGU-Sarangani nga gipasitaab sa nahisgutan.
Wala usab ‘authority’ sa DTI og Bangko Sentral ng Pilipinas si Apolinario aron mangolekta og minilyon ka pesos gikan sa mga kliyente/depositees. Nanawagan karon og hustisya ang KBP SOCSKSARGEN Chapter alang kang Bombo Janjan og Bombo Boi.
