GENERAL SANTOS CITY – Dako ang pagtuo ni Mayton Sipi nga may kalabotan sa pulitika ang nagpaluyo sa gipahigayon nga search warrant operation sa kapulisan, Sabado sa gabii, sa Prk 16 Brgy Fatima ning dakbayan nga nagresulta sa pagkapatay sa anak niini og umagad.
Giila ang mga napatay nga mag-asawa nga silang Noren Apil, 50, municipal kagawad sa Palimbang, Sultan Kudarat ug ang asawa niini nga si Juliet Sipi, 46, nga nanag-iya ug motorshop.
Sa pakighinabi sa Bombo, gibutyag ni Sipi nga sa pagkabalo niini, nagpasang-at ug kaso ang iumagad nga si Loren batuk kang Mayor Abubacar P. Maulana sa Palimbang Sultan Kudarat.
Sa pahayag niini, wala nalambigit ang mag-asawa sa gidiling droga ug gani, walay narekober ang kapulisan nga droga sa balay sa magtiayon gawas sa duha ka short firearms nga ang usa ang lisensyado.
Sa pagsaysay ni Sipi, alas-11:00 miaging gabii, dihang gipatuman sa kapulisan ang search warrant kalabot sa pagsupak sa Comprehensive Dangerous Drugs Act of 2002.
Kalit matud pang gilamba ug giguba sa kapulisan ang pultahan sa balay, dayon nakadungog na sila og buto-buto sa pusil gikan sa lawak sa magtiayon.
Nakit-an na lang niini nga gigawas sa kapulisan gikan sa balay ang lawas sa magtiayon nga nagkadugo og gidala sa ospital.
