GENERAL SANTOS CITY – Obligasyon sa lokal nga panggamhanan nga sutaon ug imbestigahan ang mga investment scam o unsa mang mga matang sa negosyo hilabi na kon kontrobesyal, nga anaa sa ilang lugar sama sa KAPA.
Kini ang gihingusgan ni Atty Rogelio Garcia, sa pakighinabi sa Bombo Radyo. Sumala pa nga dili na kinahanglan ug complainant o reklamante una mulihok ang mayor, business permits and licenses division, ug uban pang ahensya sa gobyerno, nga may disgresyon sa susamang hisgutanan, aron maproteksyunan ang ilang mga konstituwente.
Kalabot sa KAPA o Kabus Padatoon, gitawag pa ni Atty Garcia nga ‘gwapo nga raket’ o clever kon marunong nga pamaagi sa scam kon pagpangilad sa mga tawo, gumikan pinaagi sa donasyon ang gipirmahan nga pag-invest ug salapi.
Nagpasabot kini nga dili makareklamo ang mga miyembro ug wala gayuy mapaninglan kon ugaling unsa man ang mahitabo sa ilang gipasulod nga salapi.
Tambag pa ni Atty Garcia sa katawhan nga dili gayud magpataka ug desisyon nga mutuo gilayon sa mga susamang investment scam nga ang salapi mutubo ug doble nga sobra pa sa kitaon sa bangko sulod lamang sa pipila ka adlaw, semana o bulan.
Una musulod sa unsa mang matang sa investment, angayan matud pang sutaon ug tun-an una pag-ayo, gumikan kon susama ang pamaagi o sistema sa KAPA, pagpangilad ug estafa gayud.
Samtang, naghatag usab ug pagpaklaro si Atty Garcia nga kasamtangang national director sa Development Bank of the Philippines, kalabot sa kon pila ang kitaon sa salapi kon ibutang sa bangko.
Matud pa, kon pinaagi sa savings, kasagaran ang interest anaa lamang sa one percent per annum o matag tuig.
Kon pinaagi sa time deposite usab, dili matud pa gani mulampas ug 4 percent per annum o matag tuig. Samtang kon investment sa security o sa mga dagkong kompanya, anaa lang kasagaran sa 6.5 – 7.5 % per annum.
Hinungdan nga kon muabot na ug 10, 20, 30% o mas dako pa sa matag bulan sama sa sistema sa KAPA, nga hilabihan kadako itandi sa kitaon kon isulod sa bangko, klaro matud pa nga binuang ug pagpangilad kini.
Dungan niini, gihingusgan ni Atty Garcia nga angayang magmatngon gayud ang publiko ug dili magpadala sa mga mangingilad.
