GENERAL SANTOS CITY – Mixed emotions ang gibati karon sa mga miyembro sa Ramon Magsaysay Memorial Colleges Himig Chorale gikan sa General Santos City, nga musalang karong buntag sa championship round sa 7th Bali International Choir Festival Competitions, sa Bali, Indonesia.
Kini ang gibutyag ni Sir Leonardo Rey “Bing” Cariño, cultural development officer sa RMMC, gikan sa Bali, Indonesia, sa exclusive interview sa Bombo Radyo.
Anaa sa 17 ka mga nasud matud pa ang apil sa 7th BIFC, kung asa adunay tulo ka grupo sa mga Pinoy ang miapil, lakip na ang RMMC Himig Chorale.
Matud pa, grabeng struggle ang ilang naagian hilabi na kalabot sa pinansyal, gumikan 30 sila apil na ang mga estudyanteng choir members ang gipadala sa Ramon Magsaysay Memorial Colleges, gawas pa sa mahal nga registration ug hotel and accommodations.
Hinungdan nga may mga higayon nga naghinilakay matud pa ang pipila sa mga estudyante gumikan sa nagsagol nga kakulba ug excitement, ug sa mga hagit nga ilang nalutsan sa maong kompetisyon.
Matud kang Cariño, walo ka mga kalabang nasud ang ilang na-eliminate sa gospel and spiritual category.
Samtang sa mixed choir, mukabat matud pa sila sa 12 ka nasud nga nag-indig, ug lima lamang ang nahibilin sa championship, lakip ang RMMC Himig Chorale.
Unang silang musalang sa mixed choir category karong buntag, dayon diretso sila sa gospel and spiritual category.
Gilaumang masayran ang resulta sa kompetisyon human ang pipila ka oras.
Kahibaluan nga kon palaron nga magkampeon, muabanse ang RMMC Himig Chorale sa matigayon nga Grand Prix kung asa mag-atbang ang tanang mga kampeon.
