GENERAL SANTOS CITY – Karong adlawa, Biyernes, gitakdang ipahigayon ang regular session sa GenSan City Council.
Kini human nga wala nakapahigayon ug sesyon kaniadtong Martes, human miuban ang kadaghanan sa mga miyembro sa konseho sa Malaysia alang sa pagsuporta kang Sen. Manny Pacquiao sa away niini kang Lucas Matthysse.
Nasayran nga Lunes pa nakauli ang entourage sa fighting senator, apan wala una nakapahigayon ug sesyon pagka-Martes gumikan gipangkapoy sa biyahe.
Hinungdan nga nakasabutan sa mga konsehal nga isibog karong adlawa ang sesyon.
Kahinumduman nga Lunes miaging semana gipahigayon ang ulahing sesyon sa Sangguniang Panglungsod.
Hinuon, giklaro ni Vice Mayor Shirlyn Nograles nga gitapos nila ang tanan nilang trabaho miaging semana, ug walay gibilin nga trabaho una mibiyahe kauban sa entourage ni Pacquiao.
Pagpaklaro usab sa kadaghanan sa mga konsehal nga miuban, libre sila sa biyahe, apan sila matud pa ang nagbayad sa ilang ticket sa Axiata Arena.
Gikabutyag nga miuban gayud sila sa Malaysia gumikan makauulaw kon walay mga taga-Gensan, gumikan mitan-aw gani si Pangulong Rodrigo Duterte.
Hinungdan nga angayan lamang nga mitan-aw usab sila didto ug misuporta sa away sa gikonsiderang Pambansang Kamao.
Nasayran nga planong imbitahan sa sesyon karong adlawa si Sen. Pacquiao aron itimbaya ug pasidunggan sa nagmalampuson niining away batok sa Argentine boxer.
